தொடர்ந்து 5-வது ஒலிம்பிக்கில் பதக்கம் வென்று அமெரிக்க வீராங்கனை சாதனை

லண்டன் ஒலிம்பிக்கில் பெண்களுக்கான துப்பாக்கி சுடுதல் `ஸ்கீட்' பிரிவில் அமெரிக்க வீராங்கனை கிம்பெர்லி ரோட் மொத்தம் 99 புள்ளிகள் குவித்து, இந்த பிரிவில் உலக சாதனையை சமன் செய்து தங்கப்பதக்கமும் தனதாக்கினார். சீனாவின் வெய் நிங் (91 புள்ளி) வெள்ளியும், சுலோவக்கியாவின் டான்கா பார்டெகோவா (90 புள்ளி) வெண்கலமும் பெற்றனர்.

தங்கப்பதக்கத்தை வென்றதன் மூலம் கிம்பெர்லி, அமெரிக்காவின் புதிய சாதனை மங்கையாக உருவெடுத்துள்ளார். அவர் 1996 அட்லாண்டா மற்றும் 2004-ம் ஆண்டு ஏதென்ஸ் ஒலிம்பிக்கில் டபுள் டிராப் பிரிவில் 2 தங்கப்பதக்கமும், 2000-ம் ஆண்டு சிட்னி ஒலிம்பிக்கில் டபுள் டிராப்பில் வெண்கலமும், 2008-ம் ஆண்டு பீஜிங் ஒலிம்பிக்கில் ஸ்கீட் பிரிவில் வெள்ளிப்பதக்கமும் வென்றிருந்தார்.

இதன் மூலம் தொடர்ந்து 5 ஒலிம்பிக்கில் தனிநபர் பிரிவில் பதக்கம் பெற்ற முதல் அமெரிக்கர் என்ற மகத்தான சிறப்பை பெற்றிருக்கிறார்.